Wednesday, December 17, 2014

ओटमिल वड्या

साहित्य:
३/४  वाटी तूप (बटर - शेंगदाणे, तीळ, बदाम किंवा कोणतंही)
१/२ वाटी मध
३ वाट्या ओटमिल (सिरीयल) 

कृती:
ओटमिल (सिरीयल) भाजून घ्या. (हलका तपकिरी रंग येईपर्यंत)
भाड्यांत तूप आणि मध एकत्र गरम करा
भाजलेले ओट त्यात मिसळा
चिमुटभर मीठ घाला
सुका मेवा (बदाम, पिकॅन, खजूर) पाहिजे असेल तर घाला.
मिश्रण सपाट भाड्यांत पसरा.
फ्रिज मध्ये २ तास ठेवा.
वड्या कापा.

साधारण २० वड्या तयार होतात.






Saturday, December 6, 2014

खांडवी - कोकणातील गोड पदार्थ

साहित्य:
तांदूळ कण्या/रवा - २ वाट्या (कण्या नसतील तर तांदूळ धुवून सुकवायचे व नंतर मिक्सरमध्ये रवाळ
(जाडेभरडे) करायचे.)
गुळ: १ वाटी
पाणी: ४ वाट्या
तूप: ४ चमचे
मीठ : चिमुटभर
ओलं खोबरं : वड्यांवर घालण्यापुरतं, अंदाजे ४ चमचे

कृती:
  • तांदूळ कण्या न मिळाल्यास तांदूळ धुवून वाळवून घ्यावेत व मिक्सरमधून कण्या राहतील इतपत बारीक करावेत.
  • तूपावर लालसर रंग येईपर्यंत तांदूळ रवा भाजावा
  • पाणी उकळायला ठेवावे. उकळी फुटल्यावर गुळ घालून विरघळू द्यावा.
  • भाजलेला तांदूळ रवा टाकावा. एक दोन वाफा येऊ द्याव्यात. गोळा होईल असा शिजवून घ्यावा.
  • ताटाला किंवा ओट्यावर तूपाचा हात फिरवावा
  • ओलं खोबरं भुरभुरावं
  • त्यावर शिजत असलेला गरम गरम गोळा घालावा व हलक्या हाताने गोळा पसरावा. (हात न भाजू देण्याची काळजी घ्यावी.)
  • वरती पुन्हा ओलं खोबरं भुरभुरावं.
  • थंड झाल्यावर वड्या कापाव्यात.

    साधारण ३० ते ३५ वड्या होतात.





Tuesday, August 26, 2014

पातोळे

हा बहुधा सारस्वती पदार्थ आहे. पण कोकणात सर्वत्र केला जातो.

साहित्य:
१ काकडी मध्यम आकाराची किसून
३/४ वाटी तांदूळ पीठ
१/२ वाटी गुळ
२ चमचे रवा
१ चमचा तेल किंवा तूप
चिमूटभर मीठ
हळदीची पानं ७-८

कृती:
काकडी सालं काढून किसून घ्या.
किसलेली काकडी आणि गुळ, तेल/तूप एकत्र गरम करायला ठेवा.
कढ आल्यावर रवा आणि मीठ घाला.
दोन वाफा येऊ द्या.
शिजलेले मिश्रण गार होऊ द्या.
हळदीची पानं उलटी करुन त्यावर अर्ध्या भागात छोटे छोटे गोळे थापा.
उरलेल्या अर्ध्या बाजूने पातोळा झाका.
इडली पात्रात किंवा कुकरच्या भाड्यांत (शिटी न लावता) घालून १५ मिनिटं वाफवा.
गार झाल्यावर तुपाबरोबर पातोळे खावेत. (हळदीचं पान खाऊ नये :-).

टीप: हळदीची  पानं नसतील तर केळीची वापरता येतात. ती देखील नसतील तर पार्शमेंट पेपरचा वापर करावा.












Wednesday, August 6, 2014

बेजिल पेस्तो पिझ्झा

बेजिल पेस्तो सॉस इटलीतून आलं आहे. पास्तासाठी त्याचा मुख्यत्वे वापर केला जातो. हे सॉस मी पिझ्झासाठी वापरलं आहे. त्याची कृती इथे आहे. नाहीतर विकतचं वापरु शकता.

साहित्य:
१ पॅक पिझ्झा डोव - कोणत्याही ग्रोसरी स्टोअरमध्ये deli cooler विभागात किंवा पिझ्झा चेनच्या दुकानात मिळेल.
१/४ कप श्रेडेड चीज
१ बटण मशरुम पॅक
१ भोपळी मिरची
१ कांदा
१ कॅन ऑलिव्ह

कृती:
ओव्हन ४५० डिग्री फॅरेनहाइट वर गरम करा
पिझ्झा डोव फ्रिजमधून काढून ठेवा.
भाज्या तिरक्या तिरक्या चिरा.
तव्यावर एकेक करुन भाजा (तेलाची आवश्यकता नाही). भाजताना थोडी मिरीपूड, मीठ भुरभुरवा, पाहिजे तर लिंबू पिळा
पिझ्झा डोव लाटण्याने पाहिजे त्या आकारात पातळसर लाटा. (त्याआधी पीठ चिकटू नये म्हणून खाली थोडासा मैदा/कणीक भुरभुरवा) एका बेकिंग ट्रे मध्ये रहात नाही त्यामुळे मी दोन ते तीन आयताकृती करते.
पेस्तो सॉस पसरा. (सॉस आपल्या आवडीप्रमाणे कमी जास्त वापरु शकता.)
भाजलेल्या सर्व भाज्या पसरा.
वर चीज पसरा.
ओव्हनमध्ये १२ ते १५ मिनिटं बेक करा.

कसा झाला ते मला कळवा :-).

नेहमीच्या टॉमेटो सॉसपेक्षा पेस्तोमुळे वेगळी चव येते. मुलांना खूप आवडतो.

टीप - पेस्तो सॉसला पर्याय म्हणून आपली कोणतीही चटणी वापरु शकता.






Friday, May 9, 2014

ग्रॅम क्रॅक्रर्स केक

सोपा आणि न भाजता केलेला ग्रॅम क्रॅक्रर्स केक.

साहित्य:
२ (३.४ औंस) व्हॅनिला इन्स्टंट पुडींग पावडर पाकिटं
३.५ कप दूध
१२ औंस कुल व्हिप
२ (१४.४) औंस ची ग्रॅम क्रॅकर्सची पाकिटं

फ्रॉस्टींग
६ चमचे तूप (butter)
६ चमचे दूध
६ चमचे कोको पावडर
१/४ कप साखर

कृती:
दूध, व्हॅनिला पुडींग पावडर एकत्र करा. ते मिश्रण कुल व्हिप मध्ये घालून  व्यवस्थित ढवळा.

पसरट भाड्यांत (ट्रे) ग्रॅम क्रॅकर्स पसरा. (तळ झाकण्यासाठी तुकडे  तुकडे करावे लागतील.)
त्यावर वरील पुडींग, कुलव्हिप मिश्रणातील पाव भाग पसरा
सर्वात वर ग्रॅम क्रॅकर्स येईपर्यंत क्रॅकर्स, पुडींग कुलव्हिप चं मिश्रण वापरा.

फ्रॉस्टींग:
दूध आणि तूप मायक्रोव्हेवमध्ये ४५ सेंकद गरम करा. (दोन्ही मिळून येण्यापुरतं)
त्यात कोको पावडर आणि साखर घालून व्यवस्थित ढवळा.
केकवर पसरा आणि रात्रभर फ्रिजमध्ये ठेवा.











Monday, May 5, 2014

बटाटा भाजी कॅलझोन

कॅलझोन - पिझ्झाच्या  पीठा (डोव) मध्ये सारण भरुन करंजीच्या आकारात ओव्हनमध्ये भाजतात.
नेहमीच्या कॅलझोन मध्ये चीज, हॅम अशा गोष्टीचं सारण असतं. ही पाककृती  उकडलेल्या बटाट्याची भाजी भरुन केलेली आहे.

साहित्य:
१६ औंस पिझ्झा पिठाचा गोळा (कोणत्याही ग्रोसरी स्टोअर्स मध्ये मिळतो) पिझ्झा पीठ  (डोव) कॅलझोन करण्यापूर्वी फ्रिजमधून अर्धा तास आधी बाहेर काढून ठेवा.
३/४ कप मॅगी सॉस/केचप/हिरवी  चटणी
४ बटाटे
२ चमचे तेल
फोडणीचं साहित्य (हिंग, हळद, मोहरी)
१ कप किसलेले (shredded Mozzarella) चीज
१ ते २ चमचे  कोथींबीर
२ चमचे मैदा

कृती:
बटाटा भाजी:
बटाटे मायक्रोव्हेव मध्ये उकडून घ्या. गार झाले की सालं काढून बारीक फोडी करा.
तेल गरम करुन हिंग, हळद, चिमुटभर तिखट, मोहरी टाकून फोडणी करा.
उकडलेल्या बटाट्याच्या फोडी मीठ, लिंबू, कोथींबीर टाकून परता. भाजी गार होऊ द्या.

कॅलझोन:
450°F वर ओव्हन गरम करा. ओव्हन गरम होईपर्यत बाकीच्या तयारीला लागा.
ओट्यावर १ चमचा मैदा भुरभुरवा. उरलेल्या मैद्यात पिझ्झा पीठ घोळवून घ्या. तो गोळा लाटण्याने/हाताने आयताकृती पसरवा.
पसरलेल्या पिझ्झा पीठावर चारी बाजून दुमडण्यासाठी जागा ठेवून सॉस/ केचप/ चटणी पसरा.
त्यानंतर त्यावर बटाट्याची भाजी पसरुन,  चीज पसरा.
गुंडाळून गोल करा. चारी बाजू पाण्याचं बोट फिरवून (बोट पाण्यात बुडवून) व्यवस्थित बंद करा. (पराठ्यांसाठी करतो त्याप्रमाणे).
बेकिंग ट्रे ला तेलाचा हात फिरवून त्यात ही गुंडाळी ठेवा. गुंडाळी ठेवल्यावर त्यावरही तेलाचा हात फिरवा (ऐच्छिक)
ओव्हनमध्ये १५ मिनिटं भाजा.
बाहेर काढल्यावर किचिंत गार झाल्यावर धारदार सुरीने कापा. साधारण ८ तुकडे तयार होतात.